2-боб. Рўйхатга ўзгартириш ва қўшимчаларни киритиш ва касбларнинг бирхиллигини белгилаш учун ҳужжатларни тайёрлаш тартиби

3. Зарарли ва (ёки) хавфли ишлаб чиқариш омилларига эга бўлган ишлаб чиқаришлар, муассасалар, ишлар, касблар, лавозимлар ва кўрсаткичларни Рўйхатга киритиш зарурати ҳақидаги ходимларнинг таклифлари икки нусхада тайёрланиб, иш берувчи ҳамда корхона касаба уюшмаси қўмитаси ёки ходимларнинг бошқа вакиллик органига юборилади. 4. Иш берувчи томонидан меҳнат шароитларини ўрганиш комиссияси (кейинги ўринларда — Комиссия) ташкил қилиниб, унинг таркиби иш берувчининг буйруғи билан тасдиқланади. Комиссия таркибига иш берувчининг ишлаб чиқариш бўйича ўринбосари, кадрлар бўлими бошлиғи ёки ходими, меҳнатни муҳофаза қилиш хизматининг бошлиғи ва ходимлари, бош муҳандис (мавжуд бўлса), корхона касаба уюшмаси қўмитаси вакили ёки ходимларнинг бошқа вакиллик органи вакили киритилади. 5. Рўйхатга ўзгартириш ва қўшимчалар киритиш бўйича таклифларни тайёрлаш ва иш берувчига тақдим қилиш учун Комиссия қуйидагиларни текширади: иш жойининг режаси ишлаб чиқаришлар, ишлар ва ускуналар жойлашган корхонанинг бош лойиҳасига мослигини; технологик жараёнга, ускуналарни ишлатиш бўйича қоидаларга риоя этилганини, жиҳозлар, асбоблар ва ускуналар созлигини; жамоа ва шахсий ҳимоя воситаларининг мавжудлиги ва яроқлилиги, ҳимоя кийимининг мавжудлиги ва мослигини; меҳнат шароитларини яхшилаш бўйича корхонанинг (жамоа шартномасида назарда тутилган) ташкилий-техник тадбирлар режасининг бажарилганини, технологик жараён, технологик тартибнинг мукаммаллигини, иш ўринлари автоматлаштирилганини, жиҳозланганлик даражаси, меҳнат шароитларини, хавфсизлик техникаси ва меҳнат гигиенасига риоя этилганини. 6. Текшириш вақтида аниқланган меҳнат шароитларининг белгиланган меъёрларга нисбатан бузилиши ҳолатлари ва камчиликлар аттестация ўтказилишига қадар бартараф этилади. 7. Текшириш натижалари далолатнома билан расмийлаштирилиб, Комиссия аъзолари томонидан имзоланади ва иш берувчига юборилади. 8. Аниқланган хато ва камчиликларни бартараф этиш юзасидан чора-тадбирлар белгиланиб, тегишли чоралар амалга оширилади. Текширишда аниқланган хато ва камчиликлар бартараф этилганидан сўнг, аттестациядан ўтказилиши керак бўлган ишлар, касблар, лавозимлар ва кўрсаткичлар рўйхати тузилади ҳамда аттестациядан ўтказилади. 9. Аттестация Вазирлар Маҳкамасининг 2014 йил 15 сентябрдаги 263-сон қарори билан тасдиқланган Иш ўринларини меҳнат шароитлари ва асбоб-ускуналарнинг жароҳатлаш хавфлилиги юзасидан аттестация ўтказиш тартиби тўғрисидаги низомга мувофиқ ўтказилади. 10. Аттестация натижалари бўйича меҳнат шароитларининг амалдаги ҳолати, яъни аниқланган зарарли ва (ёки) хавфли ишлаб чиқариш омиллари ҳажми, уларнинг белгиланган меъёрларидан оғиш даражаси аниқланади. 11. Аттестация натижалари Комиссия томонидан корхонанинг касаба уюшмаси қўмитаси ёки ходимларнинг бошқа вакиллик органи билан биргаликда аттестация ўтказган корхона вакиллари иштирокида муҳокама қилинади. 12. Муҳокама натижаси бўйича баённома ва Рўйхатга киритилиши таклиф этилаётган меҳнат шароитлари ноқулай бўлган ишлаб чиқаришлар, ишлар, касблар, лавозимлар ва кўрсаткичлар рўйхати тузилади. 13. Аттестациядан ўтказиш ишлари тугаши билан иш берувчи касаба уюшмаси қўмитаси ёки ходимларнинг бошқа вакиллик органи билан биргаликда ўзларининг юқори турувчи органига (вазирликлар, идоралар, хўжалик бирлашмалари, корпорациялар, уюшмалар, концернлар) (кейинги ўринларда — Ташкилот) қуйидагиларни тақдим этади: Рўйхатга киритиш учун аттестация натижалари бўйича таклиф қилинган ишлаб чиқаришлар, ишлар, касблар, лавозимлар ва кўрсаткичлар рўйхатини; аттестация ҳужжатлари давлат экспертизасидан ўтказилгани тўғрисидаги хулосасини; аттестация натижаларига асосан иш ўринларида аниқланган зарарли ва (ёки) хавфли ишлаб чиқариш омилларини бартараф этиш имкони мавжуд эмаслиги юзасидан Комиссиянинг хулосаси ва қисқача молиявий-иқтисодий асосларни. 14. Ташкилот тегишли касаба уюшмаси қўмитаси ёки ходимларнинг бошқа вакиллик органи билан биргаликда: тақдим этилган ҳужжатларни кўриб чиқади ва ўз корхоналарининг 30 фоизидан кам бўлмаган аналогик (ўхшаш) иш ўринларида аттестация ўтказилишини таъминлайди; зарурат бўлганда ҳужжатларни тақдим қилган тизимидаги корхонада назорат ўлчовларини ташкил қилади. 15. Ташкилот томонидан тизимидаги мурожаат қилувчи корхонанинг таклифи қаноатлантирилиши бўйича ижобий қарор қабул қилинса, шунга ўхшаш корхоналарнинг камида 30 фоизида аналогик (ўхшаш) иш ўринларида қўшимча аттестация ўтказилишини инобатга олган ҳолда, тегишли касаба уюшмаси қўмиталари ёки ходимларнинг бошқа вакиллик органлари билан биргаликда Рўйхатнинг тегишли қисмига (бўлимига) қўшимчалар киритиш ёки айрим касблар, ишлар, лавозимлар ва кўрсаткичларни чиқариш юзасидан таклифларни тайёрлайди ҳамда Ўзбекистон Республикаси Камбағалликни қисқартириш ва бандлик вазирлиги ҳамда Иқтисодиёт ва молия вазирлигига юборади. 16. Ўзбекистон Республикаси Камбағалликни қисқартириш ва бандлик вазирлиги Иқтисодиёт ва молия вазирлиги билан биргаликда Ташкилотнинг таклифларини қабул қилиш тўғрисида ёки рад этиш сабабларини ёзма равишда аниқ кўрсатган ҳолда 15 кун муддатда қарор қабул қилади. 17. Рўйхатга ўзгартириш ва қўшимчалар киритиш бўйича Ташкилотнинг таклифлари қабул қилинганда, Ўзбекистон Республикаси Камбағалликни қисқартириш ва бандлик вазирлиги бу юзасидан тегишли Ҳукумат қарори лойиҳасини тайёрлайди ҳамда Соғлиқни сақлаш вазирлиги, Иқтисодиёт ва молия вазирлиги, Ўзбекистон касаба уюшмалари Федерацияси, шунингдек, таклифларни тақдим қилган Ташкилот билан белгиланган тартибда келишади. Келишилган Ҳукумат қарори лойиҳаси қонунчиликда белгиланган тартибда Вазирлар Маҳкамасига киритилади.